СРЕДНЕВЕКОВЫЕ ИСТОРИЧЕСКИЕ ИСТОЧНИКИ
ВОСТОКА И ЗАПАДА

О СЪСТАВЛЕНИИ ДОХИАРСКАГО МОНАСТЫРЯ,
ЧЮДО О ОТРОЦЕ, ЕЖЕ СЪДЕЯСЯ ¹

Прииде некый велможа въ Святую гору, имы велие богатство съ собою, и искаше места, иде бы обытель ² съставити. И тако обьхажаше многа места въ Святой горе. Последи жь прииде, Богом наставляемъ, близ мора Солунскаго, обрете место зело подобно монастырскому строению, воды сладокь имуща и овощия много. Възлюби же место то, и вселися ту, и начат монастырь здати. Еже Богу поспешьствующу ему, церковь зело красну вьздвиже, 5 верхь имущи, и стену камену около монастыра съзиди. Но недаставшу имению, и ³ не възможе церковь украсити, яко же лепо есть /л. 277/ церквамъ. И начат Бога молити: «Господи, человеколюбче! Аще есть воля святому ти имени, поели человека, могуща недостаткы манастырьскыя наполнити».

Бяше же противу Святой горе островь, Лугь именуемъ. Тамо бо пасяху овца, и буволи, и прочая скоты монастырскыя. Бе же в том острове стлъпъ камень, на нем же писано бяше словы еллинскыми: ⁴ «Всякь, иже аще ударит мя въ верхъ, обрящеть злата множьства». И сего ради мнози покушахуся, ударающе въ верхь стлъпа. Но не обретаху ничесо же, щадяху бо ся ему же уготовано бяше. Бяше же юноша некы, млад възрастомь, умея писания. Съй многажди /л. 277 об./ прочиташа на стльпе писаное, но ⁵ не просту вещь быти мняше. Расмотрив же ся семо и овамо, ⁶ начат землю копати, иде же сень бяше стлъпа того, солнцу въеходящу. И абие, ⁷ тому копающу, слышит ту тонъ некый. Окопав жь, обрете камень жерновний велий. Прострет же руку вь сквозну камени, и виде под каменном котьлъ велий злата. И недоумеяшеся, что сътворити. «Аще, — рече, — повемь кому сия, возмут и мене злата ради уморютъ». ⁸ Помысли же съветъ благъ, еже ити въ Святую горю и тамо некымь от старецъ, Бога боящихся, сказати. Еже и сътвори. [133] Възьм бо неколико златныкъ с ⁹ собою, образь злата хо/л. 278/тя показати. Приде же вь едину весь, даст наемь вести его къ Святой горе.

И приплувъ въ монастырь, о нем же и предглаголахомь, приходить къ вратомь монастырскым и толцаеть. Изиде же вратарь и рече к нему: «Что требуеши?» Он же рече, яко «орудие имам къ игумену вашему». Рече же вратарь: ¹⁰ «Отиди прочее, чадо! Яко спанимь, рекше безбрадимь, невходень есть монастырь, паче же и вся Святая гора». Он же паче прошаше, еже беседовати съ игуменомъ, отходит же вратарь и възвещаеть игумену. Изиде же игумень к нему, сказа же ему юноша вся о обретении злата. Игуменъ же, слышавь, разуме, яко услы/л. 278 об./ша его Богь, и повеле юноши седети пред монастырем, донде же размыслить о вещи. Посла же к нему хлебъ и вино къ упокоению. Та же игуменъ възвещает некыим от братия о обретении злата, и тако посилаеть съ юношею въ сандали 3 инокы.

Пришедшим имь тамо, злато множество обретоша. Лукавы же врагъ въсея въ сердце единому их, и рече: «Поне же Богъ даст нам злато, и что потреба въ монастырь вести его? Не наше бо тогда ¹¹ будеть». Възвещает же съветъ съй и другому иноку, и годе бысть и тому. Но рече: «Что сътворимь, яко ¹² языкъ есть на нас?» Он же рече: «Въверземь его в море и бе/л. 279/с печали будем». Възвестиша же два тие и третиему съветъ тъй. Он же възбраняше им, глаголя, яко «зле съвещасте: Аще бо възможемь человекъ утаити, но Бога утаити не можемь». Они же съ запрещением рекоша: «Аще не пристанеши намь, въвержьмь и тебе с ним въ глубину». Слышав же тъ инокъ, паче убояся и рече к нимь: «Яко же хощете, тако творите. Азъ же вамь не обличитель есмь. Кроме есмь и злата, и греха». И тако клетвами утвьрдиша его, еже не поведати о вещи. И тако въседше въ сандалъ съ златом, имуще и отрока с ¹³ собою, и камень жерновни, еже бяше вьрху злата, взяша с ¹⁴ собою. И отплувшем /л. 279 об./ им, абие взяша камень, и юношу, яко звери дивыи имше и камень на шию связавше, и въ море въвергоша. И тако прочее пловяху путь, и не дошедшемь монастыря, съкрыша злато и тамо нощь ону пребывше.

Тамо же въ предреченомь монастыри, отнуду же иноци изидоша, хотящу панамару звонити по обычаю заутрену, ¹⁵ въходить въ церковь. И слышить храпение въ олтари, и убояся, и прииде къ игумену, и възвещаеть ему вещь. Он же укаривъ его и страшлива нарече. Рече ему: «Иди, сътвори знамение крестное, и ничто же не приближится к тебе». Отиде же пана/л. 280/марь второе, и обрете тако же, и не смея внити, и ¹⁶ пакы къ игумену възвратися. Игумен же иде с нимь и слышить тожде храпание. Вниде же въ олтарь, видит ¹⁷ юношу оного связана, и камень на шии его лежеща. И ткнув же отрока, рече ему: «Повежь ми, что случиша ти ся?» Виде бо и морскую воду текущу с ризъ его. Он же, едва в себе бывъ, рече, яко «лукавы они иноци, их же ты посла съ мною, ты мя въвергоша въ глубину морскую. И не вемь, како обретохся зде. Се ми толико видевшу: егда въвергоша мя ты иноци въ море, видехъ два мужа страшна, единъ другому глаголющь: ”Архаггеле Михаиле, отнеси его прочее въ свой монастырь”».

Повеле же игуменъ ту пребыти ему до света. Белить же панамару церковь заключити и заутрену въ притворе пети. «И аще тя въпросеть неции о утрене, рци имъ, яко отець тако повеле». /л. 280 об./ Сам же ста у врат, отнуду же хотяху они лукавы иноци приити. Свитающу же дню, ¹⁸ и иноци от моря приидоша. Игумен же повеле в било ударити и всемь братиямь изити въ сретение тех инок. Видев же игуменъ инокы, въпрашаше ихъ о здравию, како путь прешли суть и где есть, рече, четвертый. Они же, яко гневающеся, реша: «Мы послушахом тебе, отче, ¹⁹ оному же ничто же ведущу, и съкрыся от нас». Рече же игуменъ: «На Божии воли да будет». И внидоша в монастырь. Повеле же и церковь отворити. И поим же всю братию и лукавыя они инокы, и приведе ихъ, иде же юноша лежаше. Начат же их юноша обличати, яко убийца тому бывше. Видевше же ты иноци, яко безгласни бывше, не имуще, что отвещати. Повеле же игуменъ связати их, донде же въздадять обретеное злато, иже исповедавше и злато все цело принесше въ [134] мона/л. 281/стырь. Тем же отецъ яко достойных проклятию проклят и прочее от монастыря изъгна.

Възьмше же злато оно, начата здати, яже къ потребе монастыру. Създа же и притворъ зело красьнъ, 5 верхъ имущь. И камень онь, иже бяше на шии юноши, узидаше близъ церковных врат, и есть видимъ всеми даже и до днесь. Мнози бо приходящей, студеною болезнию одержими, исцеление приемлют. Прешедшим же неколицемь летомь, и игуменъ от жития отходить. Тъй же избавлени от мора юноша, о нем же намь слово, въ иноческая одеявся и священству сподобився, бываеть вторы по отци игуменъ, тако игумену повелевшу. Иже и тъй всякыми добротами церковь ту украси, подписанми же и патоси, рекше помостом. ²⁰ /л. 281 об./ Паче же и съсуди сребреними и златыми удовливъ ту, яко и сама церкви, аще и не глаголемь вещми же, паче являют.

Сътвори же и корабль в манастыры том. Бяше же в томь корабли действие некое преславно святого архистратига Михаила: иде же бо аще посилаху братию въ том корабли, корабль же яко самовластенъ си, и поспешение имея архаггела, где хотяше, тамо идяше. И не слушааше ни ветра, ни братию, но тамо идяше, иде же архаггеломъ наставляем бяше. Случи же ся таково: едино послаше пшеницу купити, яко да привезена будет въ монастырь братиямь. Получившем же им плавание благополучно и корабль пшеница наплънивше, и къ мона/л. 282/стыру ²¹ пловяху. Бывшим же им близ монастыря, абие корабль к монастыру пристати не хотяше, но инуде шествие творяше. Видевше же иже в корабли братия в печале и страсе беху, не ведуще, камо идяху. По некых же днех приста корабль къ Александръскому пристанищу, тамо гладу сущу въ граде велию. Иже и видевше корабль, плънъ пшеници, прияша та, яко от Бога посланое темь на препитани. И пшеницу убо взяша и в тоя место плънъ корабль пепра, рекше перцу, ²² насипавше, прочее отпустиша. И яко же бысть корабль, плънъ пъпра, пакы братия въ корабли къ своему монастыру пловяху, користь многу носяще.

/л. 282 об./ По сем же времени и тъй игуменъ къ Господу отходить. Старци же тоя обытели, позавидевше, яко всегда корабль, ямо же хотеяше, идяше и не по своя ихъ воля, абие пияни съвещавшеся и хврастие принесше, и тако корабль зажгоша. Тогда излете от корабля голубь белъ, всемь зрящим. И гласомь человеческымь глагола: «Поне же, Дохияръ, хотехъ стену твою злату поставити, се убо оставляю вас». И тако прочее кораблю сгоревшу, и монастырь начатъ низитися.

Видевше же тыи иноци, яко умретъ предбывши игуменъ, тъй ²³ же, иже от них въвержени в море, абие пакы приидоша въ монастырь, и мало поживше, скончашася. Лежавше же въ гробе 15 летъ, и не растлеша. На некогда мору велю бывшу в манастыру, нужа бяше место, иде же погребаютъ. Поне же всуда место камено есть, мяккое же земли зело мало. Копавше ²⁴ же некоему брату, гробъ обретоша единого, зле смердяща. На ²⁵ другом месте начата копати, и обретоша и другаго, тако же смердяща. И уведевше, яко ты суть прокляти, иже юношу злата ради въвергоша в море. И проче ихъ ²⁶ /л. 283/ земля не растли. Тем же ископани бывша на показание и прочим. И суть и до сего дни черны и злосмрадни, стояще къ стене прислонени, отверстыма ²⁷ устнама. Мниси, приходяще к нимь, мечюще имь камение в гортани, абие сквозе скоро афедроном исходить на землю. Глаголюще к нимь: «Въсхотели есте злато ясти, а ныне ядите камение вместо злата», наругался имь глаголюще. И сиа о семь тако.

Комментарии

1. На поле против заглавия: «Сеп(темврия) 6». Заглавие дано также в виде колонтитула на нижнем поле, частично срезано: «О съставлени Дохиярскаго монастыря».

2. Над строкой вариант: «монастырь».

3. Союз «и» надписан над строкой.

4. Слова «словы еллинскыми» надписаны над строкой.

5. Союз «но» надписан над строкой.

6. Слова «семо и овамо» надписаны над строкой.

7. Далее зачеркнуто «оды».

8. Исправлено, в рукописи «уморетъ».

9. Предлог «с» в рукописи пропущен.

10. «Рече же вратарь» записано на поле.

11. Исправлено, в рукописи «тогди».

12. «сътворимь, яко» записано на поле.

13. Предлог «с» в рукописи пропущен.

14. Предлог «с» в рукописи пропущен.

15. Исправлено, в рукописи «заутрнену».

16. Союз «и» надписан над строкой.

17. Исправлено, в рукописи «видити».

18. «дню» записано на поле.

19. «отче» записано на поле.

20. Толкование «рекше помостом» записано на поле.

21. Исправлено, в рукописи «мостыру».

22. Толкование «рекше перцу» записано на поле.

23. Исправлено, в рукописи «та».

24. Исправлено, в рукописи «копавже».

25. Исправлено, в рукописи «Иа».

26. Далее следуют три зачеркнутые строчки текста.

27. Исправлено, в рукописи «отвертыма».